A orixe do Can de Palleiro está nas rexións de Centro Europa, que coas migracións se asentou no norte e noroeste de España. Tratábase dun can sufrido e traballador, incansable, que se empregaba para levar as vacas no prado e impedir que se escaparan, acompañaba a anciáns e nenos nas casas e avisaba da presenza de estraños. O nome "can de palleiro" vén do feito de que en épocas de escasez era un can considerado animal de segunda, que sobrevivía comendo o que atopaba e durmindo no palleiro.

No ano 2002 constitúese o Club de Raza do Can de Palleiro, única entidade recoñecida oficialmente pola Xunta de Galicia como colaboradora na recuperación da raza e que se encarga da parte práctica de todo este proceso. O seu obxectivo é principalmente que esta raza se consolide e sexa un referente no futuro.

Na actualidade existen algo máis de 600 exemplares rexistrados por toda Galicia, e algún fóra de Galicia como en Noruega, México, Brasil, Castela-León, País Vasco e Cataluña.